மானிய விலைசமையல் எரிவாயு சிலிண்டர்களின் எண்ணிக்கைய, 12 ஆக உயர்த்த சம்மதம்

மானிய விலையில் வழங்கப்படும், சமையல் எரிவாயு சிலிண்டர்களின் எண்ணிக்கையை, 9 லிருந்து, 12 ஆக உயர்த்த, காங்கிரஸ் மேலிடம் சம்மதம் தெரிவித்துள்ளது.

 ஒரு குடும்பத்திற்கு, ஆண்டுக்கு, ஒன்பது சமையல் எரிவாயு சிலிண்டர்கள் மானிய விலையில் வழங்கப்படுகின்றன. இந்நிலையில், கடந்த வாரம், டில்லியில்,காங்கிரஸ் ஆளும் மாநில முதல்வர்களின் ஆலோசனை கூட்டம் நடைபெற்றது.அதில் பங்கேற்ற,காங்கிரஸ் முதல்வர்கள் பலரும், சிலிண்டர் பிரச்னையை, பெரிதும் சுட்டிக் காட்டியுள்ளனர். 
சட்டசபைத் தேர்தலில், காங்கிரசுக்கு இவ்வளவு பெரிய தோல்வி ஏற்பட, முக்கிய காரணமே, சிலிண்டரின் விலை தான் என, குறிப்பிட்டுள்ளனர். 
மேலும், 'சிலிண்டருக்கு உண்டான, மானிய பணத்தை, 'ஆதார்' அட்டையை பயன்படுத்தி, வங்கிக் கணக்கில்வாங்கிக் கொள்ளலாம் என்ற, மத்திய அரசின் கொள்கை, நடைமுறைக்கு ஒத்துவராது' என்றும், அவர்கள் தெரிவித்துள்ளனர். 

இதையடுத்து, மானிய விலையில், வழங்கப்படும் சிலிண்டர்களின் எண்ணிக்கையை, ஒன்பதிலிருந்து, 12 ஆக உயர்த்தலாம் என, காங்கிரஸ் மேலிடம் முடிவு செய்துள்ளது.இதுகுறித்து, அமைச்சர் வீரப்ப மொய்லிக்கு தெரிவிக்கப்பட்டு, அதற்கான பணிகள், பெட்ரோலிய அமைச்சகத்தில், தீவிரமாக நடைபெற்று வருகின்றன. இதற்கான அறிவிப்பு, விரைவில் வெளியாகும் என, தகவல்கள் தெரிவிக்கின்றன